free web hosting | free hosting | Business WebSite Hosting | Free Website Submission | shopping cart | php hosting

Sito ufficiale della Mailing List NapoliBella
Home   GuestBook   E-Mail   Pizziate   Incontri    Foto personali   Attualità ed Articoli
Foto di Napoli   Foto furastiere   Poesie    Rrobba ammiscata  
Ricette  Siti preferiti  


Destinazione nord

Campagne abbandunate
albere cu''e rame ca se stenneno
deritto verso 'o cielo
quase a cercà pietà
e moreno
pecchè so' trascurate
'a chi l'ha tanto amate
e mo l'adda lassà
pecchè nun po' campà
cu''e frutte
ca so' pavate a prezzo 'e carità
e veneno vennute
dint''e puteche 'e tutt''e verdummare ,
comme a brillante rare .
Miseria 'e na terra
ca putesse dà oro
e invece dà chiummo
pecchè 'a dint''e ccarne 'e nu bracciante
gente senza cuscienza
addà tirà cchiù sanghe 'e na < mignatta >
pecchè s'adda fà chiatta
appezzentenno all'ate .
Gente che s'arricchisce
a nnomme d''a camorra
s'accatta
cu' na magnata 'e fave
'o campagnuolo e 'a terra
tutt''a fatica 'e n'anno .
Da 'e Puglie , d''a Calabria ,
'a Napule ogne juorno
parteno tanta trene
destinazione Nord
e restano cca bbascio
sule guagliune e femmene
mentre dint''e ccampagne
chiagneno abbandunate
ll'ore passate inutile
'e frutte 'e tutte ll'albere d''o sud .

Luciano Somma

da " DIMANE "
Ed.Degli Artisti -Napoli
1977