free web hosting | free hosting | Business Hosting | Free Website Submission | shopping cart | php hosting

Sito ufficiale della Mailing List NapoliBella
Home   GuestBook   E-Mail   Pizziate   Incontri    Foto personali   Attualità ed Articoli
Foto di Napoli   Foto furastiere   Poesie    Rrobba ammiscata  
Ricette  Siti preferiti  

<
Vernacolo

O perdono

“Facite 'a carità!
Signò', facite 'a carità
ca nun me reje p''a famma...”
Cu ll'uocchie 'n terra,
ca si 'o guardasse 'n faccia
sarrìa comme specchiasse 'a sciorta mia,
affonno 'a mano dint''a sacca sana
e tiro fore l'urdemo quatrino.
Ma quann’aizo 'a capa
p'affettià 'a mossa sconceca:
ca quase me mettesse scuorno
'e proiere 'stu sordo:
'e fa’ chesta lemmosena
'o puveriello, 'nnuzzannese 'o taluorno
'ntrasatto lassa 'n trunco
smaniuso 'e s’’a smammà’.
“Nè, ma che dè?”
lle’ntruneo appriesso
‘nu poco accalummato
'ntramente ca me lanzo a isso arèto,
'nzì ca 'nzurdato e c''o sciatone 'ncuollo
nun m'assarda, 'ntussecato ca voglio pettenià'.
Ma i’moro d''o vulìo 'e 'nce accapezzà'.
“Jatevenne! Che vulite 'a me?” me fa 'mberrato.
“Vurrìa sapé’pecchè nun l'he vuluto!” facc'io
'mpettenneme 'mpicciuso.
E ‘nce 'nzeccheo 'a muneta sotto ’o naso.
“Faje pure 'o 'ntruppecuso, si tieni sulo chisto
‘int’’a scarzella?” m’arrisponne cu 'na cèra,
manco si fosse 'o figlio 'e Franceschiello.
Nunn 'o risponno: arrasso muscio muscio
spaparanzanne ll'uocchie p''a surpresa,
‘ntramente ca ‘nu friemmete
me 'ntruculea 'e mane.
Vurrìa zumparlo 'ncuollo
e 'ntummacarlo 'e pacchere. 'Nmece, c''o nuozzo
'nganno me n'esco a dì':”Si tu?!Si tu,anema nera.
Serpe ca nun se scorda...?
Si' tu omm’'e niente, ca me menaje 'n miseria
e po' tagliaste 'a corda? I' te vulesse accidere,
ma ribbrezza sentarrìa sulo a tuccarte!”
Cu 'a capa 'n terra resta llà, 'mpalato,
comm'è custume 'e tutte 'e tradeture
quanno so' 'nnante 'a tromma d''o juricio
aspettanno 'a sentenzia.
A mala pena se mantene all'erta
ma resta là, 'nchiuvato.
"<Si 'o sputo 'n faccia?
Si ommacaro me pigliasse 'o sfizio do ‘nfrascà?
Ne so' passate d'anne!
E po' nun vide ca fa provete piatà?
Ca 'o Pataterno già l'ha cundannato?>"
Aizo 'ncuollo e faccio pe' me n'j'
quanno me sento 'e dicere:”Perduoname!”
Scurbuteco, comm'a 'na scurriatata
m'avoto arèto e sferro:”Perdono?!
Ma fusse juto pure a sfrennesià'?
Te pigliaste 'e denare, ca scialacquaste
cu chella scupettina chiappa 'e 'npesa...
m'avetta vennere 'a cammisa pe' nunn’j'
‘n galera, e mò t'avessa pure perdunà...?
Ma va a murì' scannato!”
“Perduoname. Songo 'nu pover'ommo!”
m’arrisponne, ‘ntramente se mena 'e piere
‘nturciglianneme ‘e vrazze ntuorno 'e cosse.
“Nu’ me penzavo ‘e te crià ‘st’affanne...
d'arruinarte ‘nzì’ e dint'a fossa!”
Me stongo zitto pe' mantenè 'o cuntegno
e chillo 'ncasa 'a mano,
cunfromme appura ca me sto sciuglienno.
“Songo 'a feccia 'e chesta suggiti. E’ overo, ma
nun me 'mporta 'e niente.Sulo ca me perduone.
Fallo pe' carità!”
'Mbruscenannese,
ajza ll'uocchie 'ntresentute 'e chianto
'ntramente agliotte 'e lacreme p''e chieje
amare d''a vocca.
So’ lacreme ca sulo nu crestiano
pentuto overamente dint''o core
abbencieno ‘o currivo, 'a sdegnetà.
E sulo pecchè so' napulitano,
'o tocco.
Mò’ chiagno 'nzieme a isso
mentre se scioglie 'o nureco. E 'o perdono.
'O Pataterno, 'a ‘ncopp 'o paraviso
manna 'na lenza 'e sole e allumma 'a scena.
Nce ammanta c''a piatà.

Aspettanno 'e prumesse

Guardatelo!
Smicciatelo 'stu desso
‘ntramente ca sbattite 'e mane!
Nun v'addunate ca nunn’ è cchiù 'o stesso?
Nun 'o vedite cu 'na faccia strana?
Arrassosìa!
Nun v'abbedite gentarella mia.
Nu’ capiscite ca 'stu commediante
ve 'nfanfarrisce cu’’sti faccenne overe?
“Il benessere vi spetta per diritto!”
ha ditto poco fa cu’’nu fervore.
"<Ccà si nun dico chesto songo fritto!>"
penzava pe’'ntramente 'stu signore.
E vuje sbattite 'e mane.
Mane callose,
mane criate apposta p''a fatica.
Mane ca nun 'ntenneno riposo.
Mane vuliose 'e bene: sempe amiche.
“La libertà sconfigga il privilegio!”
le jesce dalla vocca, cu' passione.
"<Nun sia maje e tenisseve 'stu preggio!>"
penza 'ntramente ‘stu granno marpione.
E vuje sbattite 'e mane.
Have ragione, evviva, bene, bravo!
Cheste so' cose dette cu' onestà!
Quaccuno addirittura se cummove
pe''sti parole chiene ‘e umanità.
“Ma il sacrificio è ancora necessario
per giungere all'ambita parità!”
accocchia appriesso, ‘ntennennese al divario
ca sparte ‘a ricchezza e ‘a povertà.
Ha misso 'o dito 'ncopp' a 'stu tumore
ca 'nfiamma d'odio frate contro a frate.
"<Che s'ha da fa' pe' salvà faccia e onore!>"
penza 'o giuvenuttiello 'ncantatore.
Mò nun sbattite 'e mane!
'Nu friemmete ve corre dint'e bbene,
e ve penzate ch'isso ve dicesse
pe' fa’ cchiù priesto comme s'avrìa fa'.
Amici mieje, ma chillo nun è fesso,
e già ha truvato 'a pezza p'apparà'.
“Giustizia s'ha da far, piaccia o non piaccia.
E quanto prima si vedrà in che modo!”
Mannaggia a vuje! Ma 'o guardate 'nfaccia
'st'ipocrita? V’ha prummiso meno 'e poco.
Noooo! Pecchè sbattite 'e mane?!
...............................................................
Nun me guardà' ohi frato: sto chiagnenno.
E nun fa' cunto se sì' ghianco o niro.
Simmo sulo 'e passaggio a chistu munno,
e 'a vita è longa appena 'nu suspiro.
M'arraggio, e propetamente me ribbello
contr’a 'sta morra 'e chiacchiere e prumesse.
Songo 'a mill'anne, forze 'a 'nu milione
ca niente cagna. Dummane tutto 'o stesso.
Fra ricche e povere nun c'è comprensione.
Pe' chesto chiagno!
Pe’ chisto, ca se crede 'o pataterno
e se cunzola cu’’e castielle in aria,
e pe' vuje, ca penate 'int'all'inferno.

 

 

 

 

 

 

 

 

 

 

 

 

 

 

'E ciuccie s'appiccechene...

Ausulianno 'e fatte 'e chisti juorne
ca ‘nce cunzolano ‘ntuorne allere e 'nsiste:
c''a gente l'ha pigliate pe' taluorne,
songo democristiane o comuniste.
“Accussì nun se pò cchiù campà',
chiste ‘nce fànno provete crepà'!”
I' nun ‘nce ‘nzuppo 'o pane, nun rintozzo
pecchè nun se pò sta ferme p''e puzze.
Chiammanno nu spazzino ca me sape,
‘nce’aggio addimannato cu 'na scusa:
“Neh Gennarì, ma spiecame 'na cosa:
quann’’e pigliate 'n mano chesti scope?”
“Signò' vuje che dicite, site pazze?
Nun ‘nce ausuleano ‘a 'na semmana.”
Ha ditto 'o bosso:”Chi s'allamenta 'o strozzo!
Nisciuno ha da piglià''sti mazze 'n mano!
Si vuie perdite l'accessoriamente
so''e figlie vuoste a projere 'a panza all'aria.
Che ce ne 'mporta ca prutesta 'a gente?
Turnassero a pavà' chella miseria!”
“Vedi Gennà', n'avite di ragione,
ma nun v'ata 'mpuntà' 'cussì custante.
Ccà s'allamenta 'na pupulazione,
e se so' sfasteriate 'e chiammà' 'e sante.
'O vì' ch'è addeventata 'na lutamma
chesta 'mmunnezza nera 'e bruciatura?
'A gente l'ha appicciata. Ha fatto 'a vamma
quanno feteva 'e merda 'sta bruttura.
Tu nun 'a siente ohinè: nun te ne 'mporta?
Nisciuno tene chiù 'na bella céra,
e murmuleano: turnammo 'o quarantotto
quanno se scapezzava p''o culera!
Zennèa comme fujene cu' ‘e facce d''a libbrezza
chelli perzone cu' 'e balicie nere,
scanzanno chisti tummule 'e ‘mmunnezza.
Gesù, vide 'nu poco: so' straniere!”
“Signò', cu chesto vuje che vulite dicere,
ch'avimmo tuorto si 'ncasammo 'a mano?
Nuje faticammo pe' 'na pasta e ciciere,
e si acalammo 'a capa...manco 'o pane!”
“Gennà', capisco che afforza ‘ita fà' 'e 'nziste,
però ccà va a fernì', accussì pare,
ca cunzulammo 'a sacca ’o farmacista,
si primma nun fernesce a miserere!”




'Nu cane e 'n'ammore

‘Nu cane jettato 'n miezo 'a via
‘nce facette 'ncuntrà'.
Er'ammaluto, chino 'e pecundrìa:
nisciuno avea piatà.
I' me fermaje pe' l'accarezzà e isso,
scampanianne 'a cora a festa miauliaje,
mente c’’a lenga m'alleccava 'e mane.
Quanno t’abbistaje te currette appriesso,
e tu strillanno appaurata n'o cacciaste: ma isso
'o stesso te tiraje p''a vesta
trascinannete a forz’anzì’ addu me.
‘Nce guardajeme curiuse
comm'a ddoje aneme sperute 'e bene
mentr'isso, cu ll'uocchie zenniuse,
‘nce mmitava a ‘nce accucchià: a stà''nzieme.
Te nascette 'na speranza dint''o core,
e 'o suoccio succedette pure a me,
pecchè ogn’uno 'e nuje era sulo:
nun ce vulette niente pe' capé'. E doppo
cuoncio-cuoncio, 'mpilo 'mpilo
‘nce ne jetteme aunite tutte e tre.
Duraje surtanto 'n anno 'stu terzetto.
'Ntramente ero cagnato, scurdanneme 'o passato
dint' a 'stu muorzo de felicità.
Ma 'na sera, trasenno stracquato
sulo 'o cane truvaje ca guaeva ammurbato,
mente c’’a vrasa d’’a furnacella
sfiammava stracqua 'ntuorno 'o pignato,
allummanno 'nu cuorpo 'nterra arrugnato.
Ive tu senza vita.
Ive tu, ll'anema gemella ca me lassava accussì:
ll'uocchie spaparanzate. Dint’’e mane astrignive
'nu ritratto d’’o mio.
'A faccella patuta, stennecchiata d'a morte
mò era assaie bella: avive fernuto 'e suffrì';
avive fernuto 'e penà' comm'a 'na marìa.
'Nu ceroggeno 'nnante 'a fjura 'e 'nu santo
t'appicciavo ’a matina d’’o lunnedì,
e 'a dummeneca sciure addiruse 'e passione
te mettevo 'ncopp’’a fossa 'o campusanto.
Ma 'a quann’’o cane, ll’urdema cumpagnìa,
ll'urdemo sciato nu juorno s'ammurbaje,
e 'o juorno appriesso s''o chiammaje 'o Signore
nun l'aggio fatto cchiù: me so' abbeluto.
Nun me credevo cchiù ‘e turnà’ scaruto.
E 'a quanno so' sbudecato, è 'na semmana,
me so' provetamente ‘ntesecato:
quanno vene 'a naso 'e cane a m’arrecettà’?


'Na scarrecata 'e merda

“Gennà', parlanno cu crianza
me sento 'n arrevuoto dint'a panza.”
“Ohi Pè’, quase pur'io.
Sentenne a te m'è benuto ‘o vulìo.”
“Embè Gennà, addò ‘nce accuvammo?
Dint’a 'sta vallata nun me vene!”
“Comme 'o mantengo. Nun ce 'a faccio cchiù.
I' faccio ccà, chello ca vene vene!”
“Ma sì, Gennà', pecchè po’‘nce penzammo?
P''a faccia 'e tutte chisti belzebù
m'accovo pur'i'. Gennà' cacammo!”
Fra loro parluttiajeno tiempo fa
dduje uommene stracquate,
sciuovete jenno 'e cuorpo 'a scarrecata.
Quanno passaje 'nu zurro d’’o pizzo
e 'nzacchete, mettette 'o père 'ncòppa
e sciuliaje, e 'a faccia 'int'a chell’ata 'nchiavecaje,
'nfuriàto comm'a 'n urzo jastemmàje:
“Mannaggia 'e meglie muorte 'e chi v'è muorto,
vurrìa sapè' chi ‘nce ha cacato ccà!”
Gennaro e Peppe se 'mberrajeno stuorte,
e penzajeno 'e nce 'a fà' pavà'.
Aunite s'appresentajeno addò Signore
chiedennelo 'o favore 'e turnà' 'n terra.
“Provete ccà Gennà' cacaste, o no?”
“A me 'sto fieto pare ch'è d’’o tùjo.
Ma smiccia quanta gente nce stà' mò,
ca campa 'int'a 'st'addore.”
“Gennà', pecchè n’ addimannammo:
se vede ca nuje simme furastiere...
Bell'ò', me 'nfurmate comme se chiamma
'stu posto, 'st'abitato, 'stu maniero?”
“Abbaràte ohinè, abbaràte a vuje,
pecchè chisto è l'uneco posto d'o munno
'nzeppàto 'e case 'ntuorno a 'stu Vesuvio.
E a chi 'o scametta 'a faccia faccio tunna.”
“Ohi Pè', ca nun foss'isso
ca jette cu’ la faccia dint'a merda?”
“Gennà', smicciate attuorno. 'Nc’è merda
d’’o cratere 'n quantità. Quà' cacata vaje
cercanne 'a ccà, si chistu puosto è 'a merda
ca 'o mantene.E chesta gente comme fà a 'nce stà'?”
'A pigliaje 'e stuorto l'òmmo, e co' taluòrno
'nzurdaje 'a gente 'nzì ca 'no bello juorno
'na morra 'e case a Peppe 'ntetulaje,
e 'n'autra a Gennaro annummenaje.
'E sante po' mullàjene ogni pruggètto
smicciànno 'o munno sano: un letamaio.

 

 





 

 

 

'A famiglia

Si 'o seme nun se 'nfizza sott''a terra,
sguiglia surtanto evera gramegna.
Si 'o zappatore è bbuono, e pure 'a terra,
'a fatta d’ogne frutto sarrà pregna.

'A chianticella cresce, e cresce sana
si cu 'a natura 'a cura 'o zappatore.
Pecchè si isso nun le proje 'na mana
cresce sulo pe' genio d'o Signore.

Trasferenno sul chiano d’’o crestiano
- pe’‘ntennere so’‘e fatte d''e famiglie -
vulesse dì', si è lecito, cu’ tono:
Chello ca 'nzigne, chello sanno 'e figlie.

Anzì’ ca sponta 'e primme rentezzulle,
'o ninno ca cride ca è 'nu giglie
già è 'nu marpione: e che ciceremmuolle
se ‘mpara comme campano ‘e famiglie.

Sape chi è ‘nzisto e chi ‘o perdono;
sape chi è fesso e chi 'nu bazzariota.
Sape chellu gghiusto e chellu bbuono.
E po’ pretenne, strilla, e se revota.

'A crianza ‘nce ‘a damme mamme e pate.
Si po’simme verruse, sprucete o senza peuzo,
sierpe, scucciante, e pure allesenate,
'nce ne futtimmo ca ‘o criscimmo streuzo.
‘A criatura, comme ‘na chiantimma
hadd’avè' cumanne e tanto ammore.
‘A mamma e ‘o pate purtarrà ‘ncimma,
quanno crisciute venarrà segnore.

Si ‘mmece so’ appicceche, sputate, scarpe 'nfaccia,
sciupìe zuzzimma vuommeche e dispiette,
campànno pejo ‘e comme ‘na petaccia...
Sarrìa meglio si nun ‘mparasse ‘sti refiette,

pecchè so' sciure ca pe' compunzione
avessena restà' fore 'a famiglia.
Arrujnano 'e figlie, sfasciano l'aunione,
e nun fanno summà' dalla fanghiglia.

Passanno ‘o tiempo, ‘nce ne jammo appriesse,
quanno 'e figlie, gruosse, vanno 'a scola,
e l'ammurbamme dint’’e cumprumesse
cu 'e sorde cu 'e ricatte e 'a mussarola.

Mo’ chistu figlio s’è fatto ‘nu mappino
e appura e scazzeca, chistu muchiusurde,
‘na cosa poco lecita, quase 'nu segretino:
cuovete have ch’’a mamma arrobba ‘e sorde

da ‘na sacca sigreta d''a giacca di papà,
il quale p'abbitudene, cosa che fa ‘na piega,
nun se ne manco abbede, ascenne a faticà'.
Cheste vene ‘mparato: ca ‘o genitore spieca.

Po’si p''a tradizione 'mpuntate 'e piere 'nterra,
e senz'aggiurnamiente vulite putestà,
tra figlie e genitori sarrà sempe 'na guerra.
E i figlie, pe' lezione... sceglieno 'a libbertà.
'O suonno

Comme aggio 'nchiuso ll'uocchie aiere sera
subbito doppo me songo sunnato
ca jevo cammenanno allero allero
pe''na strada 'e campagna 'nzularchiata.

'Nnante a me,- ma luntano assaje -
'nce steve 'nu paese ca luceva.
Rapette 'e scelle e subbeto me 'nvulaje,
e 'nc’arrivaje ‘int'a 'n’uneca leva.

'E strate erano chiene. Quanta gente!
M'ammucciunaje dint'a cunfusione,
'n mieze a gente 'e tutte 'e cuntinente.
Che munno eve chisto? Concrusione,

chille ca jeve 'nce puteva stà',
pecchè 'a Terra mò era una nazione,
e 'a tutt''e parte 'nc'era libbertà.
Chesto appuraje chino 'e cummuzione.

Ero surtanto ‘a poco appena juto
e curiuso giravo p''a città,
ca poche fusene 'e cose cunusciute
pecchè tutto era nuovo 'a ccà e 'a là.

Palazze gruosse 'n mieze alli ciardine,
arbere 'nfila e, sparze 'int'all'addore,
piscine e campe 'e juoco stevano chine.
Cu' tutta 'st'ammujne nun c'era 'nu rummore.

Nun te 'nzurdave ‘n auto ‘mpertinente
p’’o mutivo ca nun ce ne steva una.
'A gente cammenava commoda, alleramente.
Nisciuno c’alluccasse. Pareva 'e stà''int'a luna.

'O fatto chiù curiuse, ca fuje sfranciuso assaie,
fuje quanno stezzosa 'na famma me venette.
‘O stommaco bruntulaje pe’ degnerse ‘e quaccosa.
Ma niente avette.

“Avite lavurato? Mustrate 'o documento.
Cca primma d''o diritto c'è il dovere.
Si nun fatecate nun avite niente!
Chesta è la legge pe’ magnare e bere.

“Ma chi v'ha ditto a vuje ca nun fatico?
‘Mmirciate 'e mane. Sò''e mane 'e 'nu scrivano,
pecchè c’’a' penna i’ scrivo, caro amico,
e chi me pava, nun me pava invano.”

“Pacare?! Fusse 'nu pazzaglione?”
me dice cu 'nu tono strammo assaje:
“Ccà nun se pava la retribbuzione.
Doppo 'o duvere tutte 'e deritte haje!”

“Uh mamma mia! Chesta è demuocrazìa?
Si accussì è, pija 'sta carta e damme,
ca vaco a faticà' addò’ vuò’ca sìa
‘nzi’ ca doppo stuto chesta famma...”

“Addo’ te puozzo schiaffà’?” dimanna 'e jetto.
“Damme 'a fatica, chella abbituale
d''a quale, amico mio, songo pruvetto.
I' faccio pavà''e tasse. ‘O posto mio è statale!”

Che dicette 'e male nun 'o saccio.
'Ncuollo me se menaje, e ‘nu punio justo
'nfaccia me chiavaje. M'arreducette ‘nu straccio...
e me scetaje 'nzuppato ‘ncoppa 'o lietto.

Mutive 'e chistu suonno? 'Nu zuffunno.
'A gente campa comme meglio và,
ma smanea sempe ‘e cagnà ‘o munno,
pecchè vurrìa abbiento, commete, e libbertà.




 

 

 

 


‘A sciorta

‘A sciorta nun s’acchiappa.
Vene e nisciuno sape pecchè.
Tutte ‘a vurriano accanoscere primma.
Quanno vene a lu munno ‘nu ninno,
o ‘nu crestiano more:
pe’ chillo songhe avurie ‘e bbona sciorta,
mente pe’ chisto... embè, se n’era jì!
Sì’ puveriello: è chesta ‘a sciorta toja.
E si sì’ ricco: sì’ nato c’’a cammisa.
Ognuno tene ‘nu destino,
murmurea ‘a gente ‘nzepetianno ‘ncoppo.
Chello ca oje è attuccato a me
dimane putesse tuccà’ a te.
Nun se scanza d’’a sciorta.
Chi se fa’ ‘ndivinà’, chi se fa leje ‘a mano,
chi addimanne ‘e carte e chi ‘a meggera.
S’ammoccano ca chella fosse ‘a sciorta,
‘nzi’ ca passanno ‘o tiempo
niente s’avvera ‘e chello ca se spera.
Sulo chillo ca campa comme vene
nun se ‘mporta ‘e chello ca è ‘a sciorta,
pecchè tene appresente ch’alla fine
d’’o cammino, se trova sulo ‘a morte.